Informasjon til lærarar som skal ha med seg skuleklassar torsdag og/eller fredag.

Tryggleik:

·         Når din skule går av bussen vil de bli tatt i mot av ein elev frå vidaregåande. Han/ho ber på eit skilt med din skule. De går etter han/ho til arenaen og han/ho viser dykk til skulens base. Der plantar han/ho skiltet til skulen og kvar skule vil dermed få sin base.

·         Når konkurransane er over vil de også bli følgt tilbake til bussen på same måte. Ved avreise må de rekne med litt venting då alle skulane må ned att i eit visst system. Dette styrer elevane frå vidaregåande.

Aktivitetar under arrangementet:

·         Når de er komne til basen dykkar er det mange aktivitetar de kan vera med på. På området er det blant anna ein villmarksleir, klatrepark/leikepark, akebakke med akebrett til utlån, skileikområde med utlån av ski til dei yngste elevane, lavoar med varmeomnar, fleire bålplassar, gapahukar, ansiktsmåling, scene med underhaldning frå skular som har meldt seg på etc.

·         Dei som ynskjer å låna ski må ha med seg skisko i sekken med NNN bindingsystem. Ingen skal ha med seg ski og stavar på bussane.

·         I villmarksleiren kan ein få varm drikke, men då må du ha med deg eigen kopp.

·         Ved scenen på skuleområdet vil det vera to speakerar som gir elevar og lærarar informasjon undervegs både angåande løpet og underhaldninga på scenen og ev. anna.

Utstyr som de treng:

·         Godt humør og klare for å laga ein skikkeleg skifest! Dette er påbode J

·         Gode klede, varm og kald drikke, mat (kan eventuelt ha med grillpølser).

·         Litt fyrstehjelpsutstyr som t.d. plaster. På arenaen vil det sjølvsagt vera helsepersonell tilgjengeleg.

·         Flagg og eventuelt plakatar – valfritt

·         Eventuelt lommepengar – valfritt. Det er kioskar og kaféar fleire stadar på arenaen.

Vel møtt til folkefest i Voss ski- og tursenter!

NM-arrangørane ynskjer å bruka meisterskapen til å motivera til fysisk aktivitet, og har difor sett i gang aksjonen “Folk i Form til NM”. Aksjonen rettar seg særskilt mot skuleklassar, og alle skular i Hordaland er inviterte til å delta. Interessa for aksjonen har vore over all forventning, og per i dag er 256 skular og over 8000 elevar påmeldt.

Skulane som melder seg på er med i konkurransen om å bli den sprekaste skulen i fylket. Resultata blir fortløpande oppdatert på www.bt.no/sprek. Skulane sender inn samla registrert aktivitet, og BT syter for at aktiviteten vert rekna om til poeng. Les meir om skulekonkurransen her: http://www.skinmvoss.no/folk-i-form-til-nm/37-kva-skule-er-sprekast-i-hordaland.html.

Gratis sesongkort

Alle 4. klassingar som deltek i konkurransen får tilbod om gratis sesongkort hjå Voss Resort. I tillegg er det planlagt ein skidag der alle påmeldte 4. klassar får tilbod om å delta. Her vil Voss Resort i samarbeid med NM-komiteen bidra med instruktørar og lån av utstyr – både for langrenn og alpint.
I følgje Synva Vinje ved Voss Resort er det per i dag over 100 fjerdeklassingar som har nytta seg av tilbodet, og Vinje reknar med at interessa tek seg opp i tida framover.

Song og dans
Lærar og spelemann Olav Undeland har laga melodi til den offisielle NM-songen. I fyrste omgang er det elevar ved Bjørgum skule som har laga tekst til songen, og den skal framførast under opningsfesten på Torget onsdag 25. januar. Alle vossaskulane vil etter kvart få melodien, og alle kan laga sin eigen tekst til denne.
I tillegg til ein eigen NM-song, har danselærar Constanse Burger laga ein NM-dans. Alle skulane på Voss har fått opplæring i dansen, som er basert på dansestilen street dance. Etter nyttår vil også alle funksjonærar få tilbod om litt ekstra trim i form av å læra seg dansen.
Folk i form-komiteen gler seg til NM, og ser fram til ei aktiv veke på Voss.